“ХӨДӨЛМӨРИЙН ЦАХИМ ЯАРМАГ-2021” АМЖИЛТТАЙ ЗОХИОН БАЙГУУЛАГДЛАА

 

Хөдөлмөр, нийгмийн хамгааллын яамнаас дэвшүүлсэн “ХАЛАМЖААС ХӨДӨЛМӨРТ” зорилтын хүрээнд “ЦАР ТАХЛЫН ЭСРЭГ ХАМТДАА-ХӨДӨЛМӨРИЙН ЦАХИМ ЯАРМАГ-2021” арга хэмжээг Хөдөлмөр, Нийгмийн Хамгааллын Яам, Хөдөлмөр, халамжийн үйлчилгээний ерөнхий газар, Нийслэлийн Хөдөлмөр Эрхлэлтийн газар, Монголын үндэсний худалдаа аж үйлдвэрийн танхим, НҮБ-ын дэргэдэх Шилжилт хөдөлгөөний байгууллага, Монголын ажил олгогч эздийн нэгдсэн холбоо, Эйч Ар Клуб ТББ хамтран 2021 оны 05 дугаар сарын 08-21-ний өдрүүдэд амжилттай зохион байгуулж өнөөдөр хаалтын илтгэлүүд явагдаж байна.
Хөдөлмөрийн цахим яармагаар хөдөлмөрийн зах зээлийн өнөөгийн байдал, ирээдүйн чиг хандлага, цар тахлын сөрөг нөлөөллийг хэрхэн хохирол багатайгаар даван туулах зэрэг агуулгын хүрээнд өдөр бүр тусгай хөтөлбөрийн дагуу цахимаар нийт 50 илтгэл нийтэд танилцууллаа. Мөн ажил олгогчийн цагийг өдөр бүр тогтмол хугацаанд зохион байгуулж, Монгол Улсын томоохон топ ажил олгогчдын төлөөллийг оролцуулан хэлэлцүүлэг өрнүүлсэн юм. Мөн Хөдөлмөр, нийгмийн хамгааллын яамнаас “Хөдөлмөр эрхлэлтийн системийн динамик загвар” хэлэлцүүлгийг Үндэсний хөгжлийн газар, Хөдөлмөр, халамжийн үйлчилгээний ерөнхий газар, Хөдөлмөр, нийгмийн хамгааллын судалгааны институт, Олон Улсын хөдөлмөрийн байгууллага, Эрдэмтэн судлаачдын төлөөллийг оролцуулан зохион байгууллаа
Тус арга хэмжээний хүрээнд ажил хайгч иргэд, оюутан залуучууд, гадаадад их дээд сургууль төгссөн болон ажиллаж, амьдарч байгаад эх орондоо ирсэн иргэдэд 182 ажил олгогч байгууллагын 2117 сул чөлөөтэй ажлын байрны мэдээ, мэдээллүүдийг нэг дороос хүргэсэн. Яармагийн үеэр цахим платформоор дамжуулан ажил хайгч иргэд болон ажил олгогчид цахимаар цаг товлон, 150 иргэн ажлын шууд ярилцлагад хамрагдсан байна.
2021 оны 05 дугаар сарын 21-ний өдрийн байдлаар www.expomongolia.org/careerexpo платформд нийт 10870, цахим хурлыг платформоор болон “Нийслэлийн хөдөлмөр эрхлэлтийн газар” фэйсбүүк хуудсаар 24141 хүн үзэж сонирхсон байна.

 

 


Хэвлэх Share