Тогооч мэргэжлийн ур чадварын үндэсний тэмцээн эхэллээ

Мэргэжлийн боловсролын “Монгол Ур чадвар 2016” үндэсний тэмцээн өнөөдөр тогоочийн төрлөөр үргэлжилж байна. Хөдөлмөр, нийгмийн хамгааллын яам, Хүнс, хөдөө аж ахуйн яам, Монголын тогооч нарын холбоо, Монголын Зочлох үйлчилгээний холбоо, Санхүү эдийн засгийн их сургууль хамтран зохион байгуулж буй уг тэмцээнд тогооч бэлтгэдэг 20 сургуулиас шалгарсан суралцагсад оролцож байгаа юм. Эдгээр тогооч нарын дунд ирэх оны 10 дугаар сард Абу Дабид болох Дэлхийн ур чадварын тэмцээнд Монгол эх орноо төлөөлөн оролцох шилдэг суралцагч бий.

2015 онд манай улсаас Бразилд зохион байгуулагдсан Дэлхийн ур чадварын тэмцээнд тогоочийн төрлөөр оролцогсод анх удаагийнх гэхэд тун амжилттай оролцсон гэдгийг мэргэжилтнүүд хэлж байна. Тодруулбал, нийлбэр оноогоор 500 давсан тохиолдолд медальт байранд шалгарах боломжтой байдаг бол манай улсыг төлөөлсөн оролцогч 479 оноо авч байжээ. Үүнээс үзэхэд манай улсад тогоочийн мэргэжлээр олон улсад амжилт гаргах боломж бүрэн бий бөгөөд бэлтгэл, дадлагажилтад түлхүү анхаарах шаардлагатай харуулж байна гэж шүүгчид хэллээ.

20 оролцогчтой тэмцээний эхний шатанд гүйцэтгэж буй даалгавар нь 2015 оны Бразилийн дэлхийн тэмцээний даалгавар гэнэ. Тухайлбал, өөрийн гараар зуурмагаа тааруулж бэлтгээд паста хийх ёстой. Мөн үхрийн болон тахианы махан стэйкийн аль нэгийг сонгож бэлтгэх ба дагалдах хачирыг өөрсдийн сонголтоор бэлдэх даалгавартай. Хоёрдугаар шатанд 6 оролцогч шалгарах бөгөөд дахин шүүлтээр шилдэг 2 оролцогчийг Абу Дабигийн тэмцээн хүртэл зэрэг бэлтгэж, өрсөлдүүлнэ. Эцсийн шалгаруулалт ирэх 9 дүгээр сард болох бөгөөд тэр үед улсаа төлөөлөх шилдэг тогоочийн нэр тодорно.

Тэмцээний эхэнд техникийн зөвлөгөөний үеэр 2015 оны тэмцээнд оролцогчоо хариуцаж явсан шүүгч-тогооч зөвлөгөө, мэдээлэл хийсэн нь энэ салбартаа сонирхолтой, шинэлэг санаагаар баялаг байсныг тогооч нар хэлж байлаа. Шүүгчдийн тухайд европ хоолны чиглэлээр мэргэшиж, дадлага зөвлөгөөний хувьд илүү гэсэн Монголын шилдэг тогооч нарыг сонгон бүрдүүлжээ.

 

Тэмцээнд оролцогсдыг танилцуулъя:

1. О.Анхбаяр- АЖУЧСургууль

2. Э.Даваажишин- Баянхонгор МСҮТ

3. А.Энхжавхлан- Говь-Алтай МСҮТ

4. Б.Сарантуяа- Завхан Политехникийн коллеж

5. Г.Пүрэвжаргал- Завхан-Тосонцэнгэл МСҮТ

6. А.Есөн-Эрдэнэ- Барилга технологийн коллеж

7. Б.Дагвасүрэн- Хүнс, технологийн ПТК

8. Н.Энххүслэн- Шинэ иргэншил сургууль

9. Б.Мягмардорж- Техник технологийн дээд сургууль

10. Л.Чинбаяр- Хөвсгөл МСҮТ

11. С.Анххүслэн- Дархан МСҮТ

12. Э.Бадамгарав- Дорнод МСҮТ

13. Н.Алтанзул- Төв-Эрдэнэ сумын МСҮТ

14. Б.Ууганбаяр- Налайх МСҮТ

15. Ц.Дуламсүрэн- Сэлэнгэ МСҮТ

16. А.Мягмарсүрэн- Орхон МСҮТ

17. Ц.Одгэрэл- Хэнтий МСҮТ

18. О.Ууганбаяр- Дорноговь МСҮТ

19. Ө.Ундрах- Өмнөговь МСҮТ

20. Э.Энх-Амгалан- Баянчандмань МСҮТ


Хэвлэх Share