Нийгмийн хамгааллын салбарын ажилтны өдрийг угтан “Нийгмийн халамжийн салбарын ажилтны ур чадварын тэмцээн” зохион байгууллаа

Монгол Улсын Засгийн газрын 2013 оны 120 дугаар тогтоолоор Нийгмийн хамгааллын салбарын ажилтны өдрийг жил бүрийн 4 дүгээр сарын 28-ны өдөр тэмдэглэн өнгөрүүлэхээр шийдвэрлэсэн. Энэхүү өдрийг угтан дүүргүүдийн Хөдөлмөр, халамжийн үйлчилгээний хэлтсийн мэргэжилтнүүдийн ур чадварыг дээшлүүлэх, хамтын ажиллагааг сайжруулах, харилцан туршлага солилцох “Шилдэг илтгэл”, “Шилдэг баг хамт олон”, “ Шилдэг ажилтан” шалгаруулах ур чадварын тэмцээнийг Нийслэлийн Нийгмийн халамжийн газраас 2017 оны 04 дүгээр сарын 25-ны өдөр Монголын хүүхдийн ордонд зохион байгууллаа.

Тэмцээний нээлтэнд Хөдөлмөр, Халамжийн үйлчилгээний Ерөнхий газрын халамжийн асуудал хариуцсан дэд дарга Т.Бадрахбаяр, Нийслэлийн Нийгмийн халамжийн газрын дэд дарга Б.Отгонжаргал, Нийслэлийн Засаг даргын Тамгын газрын Нийгмийн бодлогын хэлтсийн дарга М.Эрдэнэжаргал, Хөдөлмөр, халамжийн үйлчилгээний ерөнхий газрын Нийгмийн халамжийн бодлогын хэрэгжилтийн газрын дарга Б.Мандхай, Хөдөлмөр, халамжийн үйлчилгээний ерөнхий газрын Халамжийн үйлчилгээний хэлтсийн дарга А.Чимэгсүрэн, Нийгмийн халамжийн газрын Захиргаа, Санхүү, хяналтын хэлтсийн дарга М.Халтар, Дүүргүүдийн хөдөлмөр, Халамжийн үйлчилгээний хэлтэс, албадын дарга мэргэжилтнүүд оролцлоо. 


Тэмцээний Ерөнхий шүүгчээр Монгол Улсын Боловсролын Их сургуулийн Нийгмийн ажлын арга зүйн тэнхимийн эрхлэгч Т.Цэндсүрэн, шүүгчээр Хөдөлмөр, Халамжийн үйлчилгээний Ерөнхий газрын Нийгмийн халамжийн бодлогын хэрэгжилтийн газрын дарга Б.Мандхай, шүүгчээр Хөдөлмөр, Халамжийн үйлчилгээний Ерөнхий газрын Халамжийн үйлчилгээний хэлтсийн дарга А.Чимэгсүрэн, шүүгчээр Нийслэлийн Нийгмийн халамжийн газрын дэд дарга Б.Отгонжаргал, шүүгчээр Нийслэлийн Соёл урлагийн газрын дэргэдэх Хүүхэд, залуучуудын театрын дарга И.Хангай нар оролцлоо.

Тэмцээнд дүүргүүдийн Хөдөлмөр халамжийн үйлчилгээний хэлтсийн 450 гаруй албан хаагчдаас ур чадвар, ажил мэргэжлээрээ шалгасан 72 албан хаагч оролцон өрсөлдөж Илтгэл, ур чадвар, шилдэг ажилтан гэсэн төрлүүдээр аваргаа шалгарууллаа.

Ур чадварын тэмцээн онол практикийн бага хурлаар эхлэн, багуудын дунд ур чадварын тэмцээн, шилдэг ажилтныг шалгаруулах тэмцээнүүдээр үргэлжлэн явагдсан бөгөөд тэмцээний үеэр дүүргүүдийн Хөдөлмөр, Халамжийн үйлчилгээний хэлтсээс бусаддаа урлагийн мэндчилгээ хүргэн оролцсон.


Нийгмийн халамж, хамгааллын төлөө ажилладаг, төрийн халамж энэрэл шаардлагатай өрх иргэдийн төлөө ур чадвар, мэдлэг оюунаа зориулж яваа олон албан хаагчид онол практикийн бага хуралд өөрсдийн оюуны бүтээлээ ирүүлж салбарын бодлогын цаашдын хөгжилд хувь нэмэр оруулахуйц бүтээлч санал, санаачилгыг асуудал болгон дэвшүүлсэн байна. Онол практикийн бага хуралд 9 дүүргээс анхан шатанд шалгарсан 9 илтгэгч оролцсоноос тэргүүн байранд Баянгол дүүргийн Хөдөлмөр, Халамжийн үйлчилгээний хэлтсийн Хөгжлийн бэрхшээлтэй иргэний асуудал хариуцсан мэргэжилтэн Б.Янжмаагийн “Байнгын асаргаа шаардлагатай иргэн, түүний асран хамгаалагчийн нөхцөл байдал” илтгэл, дэд байранд Сонгинохайрхан дүүргийн Хөдөлмөр, Халамжийн үйлчилгээний хэлтсийн Хөдөлмөр эрхлэлт, халамжийн асуудал хариуцсан 9 дүгээр хорооны мэргэжилтэн Б.Ядамжавын “Зорилтот бүлгийн иргэдийн амьдралд хүнсний эрхийн бичгийн үйлчилгээ нөлөөлөх нь” илтгэл, гуравдугаар байранд Багануур дүүргийн Хөдөлмөр, Халамжийн үйлчилгээний хэлтсийн Ахмад настны асуудал хариуцсан мэргэжилтэн Ц.Бат-Оюуны “Нийгмийн халамжийн өнөөгийн байдал” илтгэл тус тус шалгарсан.

 

Ур чадварын тэмцээнд 9 дүүргийн 9 баг мэндчилгээ, гэрийн даалгавар, багуудын дунд асуулт хариултын тэмцээн, багийн ахлагчдын дунд асуулт хариултын тэмцээн гэсэн төрлүүдээр ур чадвар, эрдэм мэдлэгээ сорин оролцсоноос тэргүүн байранд Баянгол дүүргийн Хөдөлмөр, Халамжийн үйлчилгээний хэлтсийн “Сэтгэлийн гал” баг, дэд байранд Сонгинохайрхан дүүргийн Хөдөлмөр, Халамжийн үйлчилгээний хэлтсийн “Таван хошуу” баг, гуравдугаар байранд   Багануур дүүргийн  Хөдөлмөр, Халамжийн үйлчилгээний хэлтсийн “5 Х” багууд тус тус шалгарсан.


Нийгмийн халамжийн салбар, тэр дундаа төрийн халамж, энэрлийг түмэн олонд хүргэх үйлсэд хүч хөдөлмөрөө чадварлагаар зориулж амжилт бүтээл дагуулсан, хамт олноо удирдан манлайлж, шинийг санаачлан бүтээж буй Нийслэлийн Нийгмийн халамжийн салбарын “Шилдэг ажилтан”-д дүүргүүдийн Хөдөлмөр, Халамжийн үйлчилгээний хэлтсийн мэргэжилтэн, албадын дарга нараас болон Хөдөлмөр эрхлэлт, халамжийн асуудал хариуцсан хороодын мэргэжилтнүүдээс дүүрэг тус бүр нэг нийт  18 албан хаагч  нэр дэвшсэн юм. Уг нэр дэвшсэн “Шилдэг ажилтан”-ы хийсэн ажил байдлын талаар тусгай самбар гарган байрлуулж, шүүгчид нэг бүрчлэн танилцаж, шалгаруулалтыг явуулсан болно. Уг шалгаруулалт, шүүгчдийн нэгдсэн дүнгээр нийгмийн хамгааллын салбарт олон жил үр бүтээлтэй ажиллаж, хамт олондоо үлгэр дуурайлал болж байгаа Баянгол дүүргийн Хөдөлмөр, Халамжийн үйлчилгээний хэлтсийн Нийгмийн халамжийн албаны дарга З.Даваажав, Сонгинохайрхан дүүргийн  Хөдөлмөр, Халамжийн үйлчилгээний хэлтсийн 9 дүгээр хорооны мэргэжилтэн Б.Даваахүү нар бусдыгаа манлайлан “Шилдэг ажилтан”-аар шалгарсан болно.


Шалгарсан 3 илтгэлийг Нийслэлийн Нийгмийн халамжийн газраас Хүндэт өргөмжлөл, мөнгөн шагналаар шагнасан бол Монгол Улсын Боловсролын Их сургуулиас сургуулийн сэтгүүлд илтгэлийг хэвлэхийн зэрэгцээ Олон улсын Нийгмийн ажлын эрдэм шинжилгээний бага хуралд толилуулахаар болсон. Бусад илтгэгчдийг дурсгалын зүйлээр урамшууллаа.


Ур чадварын тэмцээнд шалгарсан 3 багийг Нийслэлийн Нийгмийн халамжийн газрын  Хүндэт өргөмжлөл, мөнгөн шагнал, дурсгалын зүйлээр шагнасан бөгөөд тэргүүн байранд шалгарсан “Сэтгэлийн гал” багт Тэргүүн байрын цомыг гардуулсан. Нийслэлийн Нийгмийн халамжийн салбарын “Шилдэг ажилтан”-аар шалгарсан 2 албан хаагчийг Нийслэлийн Нийгмийн халамжийн газраас өргөмжлөл, мөнгөн шагнал, дурсгалын зүйлээр шагналаа.


Уг арга хэмжээнд Нийслэлийн Нийгмийн халамжийн салбарын 300 гаруй албан хаагч оролцож, багуудаа хөгжөөн дэмжсэн нь олныг хамарсан томоохон үйл ажиллагаа болсон. Мөн Нийслэлийн Нийгмийн халамжийн газраас тэмцээнд оюун ухаан, ур чадвараа уралдуулсан нийт 72 албан хаагч, хүрэлцэн ирсэн зочид төлөөлөгч, шүүгч нартаа гарын бэлэг гардуулсан юм.


Нийслэлийн Нийгмийн халамжийн салбарын ур чадварын тэмцээнийг Royal HD телевиз бүхэлд нь сурвалжлан бичлэг хийж, Халамжийн салбарын ажилтны өдрөөр телевизүүдээр нэвтрүүлэхээр бэлтгэж байна.

 

     

  • Нийгмийн халамжийн салбарын ажилтны ур чадварын тэмцээн

  • Нийгмийн халамжийн салбарын ажилтны ур чадварын тэмцээн

  • Нийгмийн халамжийн салбарын ажилтны ур чадварын тэмцээн

  • Нийгмийн халамжийн салбарын ажилтны ур чадварын тэмцээн

  • Нийгмийн халамжийн салбарын ажилтны ур чадварын тэмцээн


Хэвлэх Share