БНСУ-ын ажил олгогчтой хөдөлмөрийн гэрээ байгуулж, Е-9 ангиллын виз мэдүүлэн явах товоо хүлээж буй иргэдийн анхааралд

 

 

БНСУ-ын ажил олгогчтой хөдөлмөрийн гэрээ байгуулж, Е-9 ангиллын виз мэдүүлэн явах товоо хүлээж буй иргэдийн анхааралд


Хөдөлмөр, халамжийн үйлчилгээний ерөнхий газар нь Монгол Улсын Хөдөлмөр, нийгмийн хамгааллын яам болон Бүгд Найрамдах Солонгос Улсын Хөдөлмөр эрхлэлт, хөдөлмөрийн яамд хоорондын хөдөлмөр эрхлэх зөвшөөрлийн тогтолцооны дагуу ажилтан илгээх болон хүлээн авах тухай харилцан ойлголцлын санамж бичгийн хүрээнд ажилладаг.

БНСУ-ын ажил олгогчтой хөдөлмөрийн гэрээ байгуулж, Е-9 ангиллын виз мэдүүлэн явах товоо хүлээж буй иргэдээс БНСУ-руу явах товыг тодруулж өгөх талаар тавьсан хүсэлтийн дагуу БНСУ-ын Аж үйлдвэрийн хүний нөөцийн хэрэг эрхлэх газрын Монгол дахь И Пи Эс төлөөлөгчийн газраас авсан тодруулгыг танилцуулж байна.

А. БНСУ-ын Засгийн газраас Монгол Улсын ажилчид хилээр нэвтрэх тохиолдолд 15 өдрийн дотор ажил, мэргэжлийн сургалт, эрүүл мэндийн шинжилгээ, даатгал, ажилд орсон тухай мэдэгдлийг гаргах гэх зэрэг үүргийг тус тус хуулиар зохицуулсан байдаг.

- Гэсэн хэдий ч БНСУ-руу тогтмол үйлддэг нислэг түр зогссоноос улбаалан хил нэвтрэх цаг хугацааг урьдчилан товлох боломжгүй байгаа ба хил нэвтэрсэн иргэд 2 долоо хоногийн турш өөрийгөө заавал тусгаарлах болсон нь тус хуулиар зохицуулагддаг гадаадын ажилчдын үүргийг хэвийн хэрэгжүүлэхэд бэрхшээлтэй байна.

- Түүнчлэн гадаадаас хил нэвтэрч буй иргэдийн тусгаарлах байрны зардал (ойролцоогоор 3 сая төгрөг), коронавируст цар тахлаас урьдчилан сэргийлэх журмыг зөрчсөн иргэдийг торгох торгууль, эмчилгээний зардал гарах магадлал нь тус тус хил нэвтрэх үйл явцад улам хүндрэл дагуулж байна.

Б. Дээрх шалтгааны улмаас коронавируст цар тахлаас урьдчилан сэргийлэх вакцин, эмчилгээ гарч нөхцөл байдал сайжрах хүртэлх хугацаанд БНСУ-ын Засгийн газрын холбогдох албан тушаалтан нар гадаадын ажилчдын хил нэвтрэх хугацааг урьдчилан таамаглах боломжгүйг ойлгож хүлээн авна уу.

В. Хүнд нөхцөл байдалд байгаа хэдий ч ажилчдыг БНСУ-д аюулгүй хил нэвтрэн, ажил, хөдөлмөрийн гарааг эхлүүлэх бүхий л бололцоог эрэлхийлж буйг үүгээр мэдэгдэж байна.

Жич: БНСУ-аас Монгол Улсад суугаа Элчин Сайдын яаманд Е-9 ангиллын виз мэдүүлж, тус визийн хүчинтэй хугацаа дуусгавар болсон иргэдийн визийг нөхцөл байдал тогтворжсон үед /цахим визийн 6 сарын хүчинтэй хугацаанд багтаан/ дахин мэдүүлэх тул дараагийн мэдэгдэл гарах хүртэлх хугацаанд  хүлээцтэй хандахыг Та бүхнээс хүсч байна.

Монгол дахь И Пи Эс төлөөлөгчийн газар: 11-310949

Гадаадад ажиллах хүч гаргах хэлтэс: 7712-1285

 

ГАДААДАД АЖИЛЛАХ ХҮЧ ГАРГАХ ХЭЛТЭС


Хэвлэх Share