“НОМООР ДЭМЖЬЕ, ОЮУНААР ДЭМНЭЕ” АЯНД ХХҮЕГ-ЫН АЛБАН ХААГЧИД НЭГДЛЭЭ

Гэр оронгүй иргэдийг түр хоноглох байранд байрлуулах үйлчилгээ үзүүлдэг төрийн бус байгууллагууд болон Нийслэлийн Засаг даргын дэргэдэх Нийгмийн хамгааллын тусгай төвийн номын санг тохижуулах, шинэчлэн баяжуулах зорилгоор Нийслэлийн Нийгмийн халамжийн газраас санаачилсан “НОМООР ДЭМЖЬЕ, ОЮУНААР ДЭМНЭЕ” аянд Хөдөлмөр, халамжийн үйлчилгээний ерөнхий газрын хамт олон идэвхтэй оролцож, номын хандив өргөлөө.  

Хамт олны дундаас уран зохиол, танин мэдэхүй, хувь хүний хөгжлийн сэдэвтэй хоёр хайрцаг ном цугларсныг Хөдөлмөр, халамжийн үйлчилгээний ерөнхий газрын дарга Л.Дашдэмбэрэл Нийслэлийн нийгмийн халамжийн газрын дарга Б.Мөнхбаярт гардууллаа.

Тэрээр, “Өвлийн хүйтэн цагт түр хоноглох байруудад хоногт 250 орчим хүн байрладаг гэсэн тоо мэдээ бий. Тэднийг нийгэмшүүлэх, амьдрах итгэл урам зориг өгөх, соён гэгээрүүлэхэд сонирхолтой ном зохиол үр өгөөжөө өгнө гэдэгт итгэлтэй байна. Цаашид нөлөөллийн олон арга хэмжээ санаачилан хэрэгжүүлээрэй. Та бүхний гаргасан санаачилга бүрийг дэмжин ажиллах болно” гэв.

 


Хэвлэх Share