ХОВД АЙМАГТ ШИЛДЭГ СТАРТ-АП ШАЛГАРУУЛАХ АРГА ХЭМЖЭЭНД 17 СУМААС 87 ЗАЛУУ ОРОЛЦОЖ БАЙНА

“Хөдөлмөр эрхлэлтийг дэмжих хөтөлбөр”-ийн хүрээнд хэрэгжүүлсэн Залуучуудын гарааны бизнесийг дэмжих хөтөлбөрт орон нутгийн залуус идэвхтэй оролцож байна.

Өнгөрсөн баасан гарагт Ховд аймгийн хөдөлмөр, халамж үйлчилгээний газар залуучуудын гарааны бизнесийг дэмжих, Шилдэг Старт-Ап багийг шалгаруулах арга хэмжээний нээлтээ цахимаар зохион  байгууллаа.  Эхний шалгаруулалтад 17 сумын 87 залуу оролцож, шинэлэг оновчтой, бүтээлч санал, төслөө танилцуулсан юм.  

Нээлтийн арга хэмжээнд хөдөлмөр, халамжийн үйлчилгээний ерөнхий газрын дарга Л.Дашдэмбэрэл оролцож хэлсэн үгэндээ, “Ховд аймаг Шилдэг Старт-Ап залуучуудыг шалгаруулах арга хэмжээг эхлүүлсэн 3 дахь аймаг боллоо. 17 сумаас оролцож байгааг харахад, орон нутгийн залуучуудад ч гэсэн бизнес хийх хүсэл эрмэлзэл шинэ санаа дүүрэн байгаа нь илэрхий байна. Хүн амын төвлөрлөөс шалтгаалан нийслэлд дүүрэг бүрээс 2 баг шалгаруулан санхүүжилт олгосон. Харин орон нутагт аймаг бүрээс Шилдэг нэг Старт-Ап багийг шалгаруулж 10 сая төгрөгийн эргэн төлөгдөхгүй нөхцөлтэй санхүүжилт олгоно. Энэ бол инноваци, шинэ бүтээлч санааг нээн илрүүлэхээс гадна залуучуудаа, тэдний хөдөлмөр эрхлэлтийг дэмжсэн бодит дэмжлэг юм” гээд оролцогч залуучуудад амжилт хүслээ.


Хэвлэх Share