БНСУ-Д АЛБАН ЁСНЫ ЭРХТЭЙГЭЭР АЖИЛЛАХЫГ ХҮСЧ БАЙНА УУ

Засгийн газрын хэрэгжүүлэгч агентлаг ХӨДӨЛМӨР, ХАЛАМЖИЙН ҮЙЛЧИЛГЭЭНИЙ ЕРӨНХИЙ ГАЗАР НЬ Монгол Улс, БНСУ-ын Засгийн газар хооронд байгуулсан хамтран ажиллах гэрээний дагуу албан ёсны Солонгос Улсад хөдөлмөрийн гэрээгээр ажиллах хүсэлтэй иргэдийг бүртгэх, мөн илгээх чиг үүргийг хариуцдаг буюу ЗӨВХӨН Е -9 визийн ангилалаар илгээж буй ЦОРЫН ГАНЦ БАЙГУУЛЛАГА.

БНСУ нь 17 улсаас гадаад ажилтан авч ажиллуулдаг. Манай Улс 2004-2025 оны хооронд нийт давхардсан тоогоор 37 мянга гаруй иргэд илгээсэн. 2024 онд 722 иргэн илгээгдсэн.

ХӨДӨЛМӨРИЙН ГЭРЭЭТ АЖИЛТАН БУЮУ ТУС УЛСАД ОРШИН СУУХ ЭРХТЭЙ Е-9 АНГИЛАЛ НЬ БУСАД ВИЗНИЙ АНГИЛАЛААС ОНЦЛОГ ТАЛУУД:
Тус Улсын Гадаад ажилчны хөдөлмөр эрхлэлтийн тухай хуулиар зохицуулагдаж, хэрэгжүүлдэг.
БНСУ-ын Хөдөлмөр эрхлэлт, хөдөлмөрийн яамны Аж үйлдвэр, хүнийн нөөцийн хэрэг эрхлэх газар шууд хариуцаж ажилладаг.
Жил бүр гадаад ажилтан авах квотыг баталж хэрэгжүүлдэг.
Зөвхөн Төрийн байгууллагаар дамжуулан илгээх буюу Хүлээн авагч Улсын Төрийн байгууллагын тусгай баталсан төлөвлөгөөний дагуу илгээгддэг бөгөөд тус үйл ажиллагаанд өөр байгууллага хөндлөнгөөс оролцох боломжгүй.
Энэхүү Е-9 ангилал буюу Мэргэжлийн бус ажилтан нь тус улсад 3 жил, үргэлжүүлэн 1 жил 10 сарыг тус улсад сунгаж ажиллах боломжтой бөгөөд нийт хуулийн хүрээнд 4 жил 10 сар ажиллах боломжийг олгодог.
Хөдөлмөрийн хөлсний доод хэмжээ 2024 онд нэг сарын цалин 2,060,780 вон байсан бол 2025 онд мөрдөгдөж буй хэмжээ 2,096,270 вон болсон байна.
Бүртгэлийн хураамж 28 ам доллар. /Нэмэлт зуучлалын хөлсгүй/
Бүртгэл жил бүр зохион байгуулдаг. /Зөвхөн Хөдөлмөр, халамжийн үйлчилгээний ерөнхий газар хариуцдаг/
Хамгийн чухал нь Солонгос хэлний шалгалт буюу EPS-TOPIK /босго оноо жил бүр нэмэгдэж байгаа/, Ур чадварын шалгалт, ярилцлага
Тэнцсэн иргэн зарласан өдрөөс хойш 2 жилийн хугацаанд БНСУ-ын Хөдөлмөрийн биржид байрших боломжийг олгодог. /Ажлын санал ирэх баталгаа болохгүй/
Тухайн бүртгүүлсэн салбартаа байршиж улмаар ажлын санал ирж илгээгдсэн иргэн тус улсад очсны дараа салбар солих боломжгүй. Ажлын байрны тухайн зөвшөөрөгдсөн бүсэд 3 удаа ажил солих эрх нь байдаг.
БНСУ-ын Хөдөлмөрийн биржид ажил хайгчийн нөөцийг улс, улсаас сонгох боломжтой байхаар байнга байлгах ёстой.
БНСУ-ын Хөдөлмөрийн биржид байршуулж баталгаажуулах нь хүний нөөцийн хэмжээг тасалдуулахгүй байх зарчмаар ажилладаг учраас гадаад иргэний байрших хугацаанд алдагдалгүй нэг доор бүх иргэнийг зэрэг байршуулахгүй цувуулж байршуулдаг. Энэ нь хөдөлмөрийн бирж 1 жилд 4 удаа олноор ажил олгогч гадаад ажилтнаа сонгох үед нөөцийг байршуулах, идэвхжүүлэх зэрэг арга хэмжээг авч ажилладаг.
УЛИРАЛ ТУТАМД АЖЛЫН САНАЛ ИРСЭН ИРГЭДИЙГ ДАРАА УЛИРЛЫН АЖЛЫН САНАЛ ИРЭХ ХУГАЦААНД ТАСРАЛТГҮЙ САР БҮР ИЛГЭЭХ ҮЙЛ АЖИЛЛАГААГ ЗОХИОН БАЙГУУЛАН АЖИЛЛАДАГ. /ЗӨВХӨН ХӨДӨЛМӨР, ХАЛАМЖИЙН ҮЙЛЧИЛГЭЭНИЙ ГАЗАР ХАРИУЦДАГ/
2024 онд тэнцсэн иргэд 2025, 2026 оны ажил хайгчийн нөөцөд орно. Ажил хайгчийн нөөц ажлын санал ирснээр ажил хайгчийн нөөц багасдаг /ялангуяа эрэгтэй ажилтны нөөц/ учраас дараагийн бүртгэл, шалгалт зохион байгуулахад урт хугацаа ордог учраас шалгалтын бүртгэлийг зохион байгуулдаг онцлогтой.

БНСУ-д илгээгдэж буй иргэдийг 3 ангилан авч үздэг. Энгийн, Тусгай, Тогтвортой ажилтан.